ذكرياتكم في طريق اخذ الليسن ^_^

[qassoomy]

راح أقولكم عن قصتي مع التدريب والليسن
طبعا انا مو من اول يوم عيد ميلادي رحت قصيت الكجة كنت ماجل الموضوع شوي
المهم من قررت اتدرب قبل لا اقص كجة قمت اتصل للمدربينالبحث عن مدرب هذي اكبر قضية بالبحرين
لدرجة انه اذا اتصل لمدرب مايقول ألوووويقول : مافي مجال ....... طراخ و يصك التلفون ....! مامداني اتكلم ياعلي ...!:mellow:
:الله يسلمكم قصيت الكشة اللي هي الكجة في شهر 9 و حصلت مدرب في شهر 6 سنة الجاية
كان يدربني يومين في الاسبوعبس اخس شي التدريب في شهر رمضان كان يقول لي اجي وراك ساعة 8 الصبح و اقعد و اجهز حالي و بعدين ما يرد علي مكالماتي
و يتصل ساعة 11:30 و يقول راحت علي النومة << و انا عيال بطة السودة قاعد من ساعة 8:tears:
اول يوم وداني في براحة مدرسة السياقة و قمت اسوق و حتي رجعت للبيت و انا اسوق
عاد في البداية كنت مسوي فلم رعب للمدرب
في الريوس المدرب كان ينزل و يروح لربعة و انا اقعد العب بروحي في السيارة

المهم خلصت التدريب و قصيت اول تراي و دخل معاي مرور كرية بس انا ما قصرت معا سويت لة فلم هندي ما ينسي طول عمرة
كان كلة يطلحتم علي راسي و انا كل شي صح سويتة جان شكثر ما يتكلم ركبت الرصيف و دعمت السيارة في المدرسة
جان سيدة رسبني و دخلت تراي الثاني كل شي اوكي في المدرسة طلعت برة و كلحين يقول لي لا تسرع و هدي شوي
و نجحني داخل و رسبني برةدشيت الثالث و انا يائس من حياتي ركبت السيارة و المرور قال لي اطلع برة المدرسة و انا اسوق جان اشوف نزل فيني زف:mellow:
انا : وش هست هو : ليش ما حاط حزام الامان:sly: انا : شسمة شسمونة نسيت:tears: هو : يصير خير انا في قلبي : راحت علي

و تاكدت ان راسب رجعت المدرسة و عطاني دفتري و قال روح وراء مكتب 11 و انا قلت في قلبي ليش
جان افتح الدفتر و اشوف ناجحححححححححححححححح

و هكذة الخذت الليسن في تراي الثالث<< بلا فضايح:sly:

 

[dragon]

مساكين :tears:
انا اخدت الليسن قبل ما يصير عمري 18 وشهر بدون قصص ولا شي

 

[purple.cs]

مساكين :tears:
انا اخدت الليسن قبل ما يصير عمري 18 وشهر بدون قصص ولا شي

آكيييد بـ وآآسطة ..
​

 

[Saheb Al Qrar]

وعليكم السلام ورحمة الله وبركاته

بوووه رجعتنا ايام الكرف
صراحة كانت ايام الواحد مايتمناها تنعاد
اتذكر قصيت الكجه عقب يوم ميلادي بيوم من صباح الله خير
واتصلت حق مدرب العيله طلع ظهره يعوره ومادري شنو فمايدرب
واستلمت اللستة مالت المدربين وكردت زين 25دينار
وماتم احد ماتصل له ,اللي يقول مشغول واللي فل واللي مريض ,, وواحد طلع متوفي بعد
وعقب مانزل علي اليأس والهم
وبعد يومين من الكجه ,كنت طالع من صلاة الفجر وكنت اسولف ويه الشيبان ويسألوني عن اخباري ففتحت لهم موضوعي مع المدربين
إلا يقولون لي روح قولي حق بوعلي داخل ترى اهو يدرب .!
هنيه آنه صرت هلون
توني ادري إن بوعلي مدرب هههه
المهم رحت له وكلمته وقال لي والله زحمه عندي وهلون لكن ابشر بكرة بإذن الله راح نبتدي
هنيه مادري شلون احس روحي طاريت من الفرحه وماياتني النودة يوم رجعت البيت
المهم بديت وياه وكان يدربني من صباح الله خير الساعه 6 و7 ,كان الجو حليو ونشاط ,بس مب شي القعده
والله يذكره بالخير كان عنده سكر ,فكل دقيقة اوقفه عن الحمامات تكرمون ,وساعات يخليني اروح الريوس ويقول لي تدرب وهوه يرقد وعليه
كملت وياه 16-18 ساعه شي هلون والباقي وقعهم لي
المهم عطوني تراي عقب اسبوع ,ودربني ساعه المدرب قبلها
وصار حظي إن ترايي يوم الخميس الساعه 6او خمس شي هلون
المهم وقت مانادوني انه ماسمعتهم
وتميت انطر وانطر والوالدة الله خليها كانت وياي تقول لي جوف شسالفتهم الكل راح مافي إلا انه وانت
رحت لهم المكتب ورى وإلا يقولون ناديناك ,قلت لهم ماسمعت ,المهم قالوا لي في واحد يقدم امتحان احين ,عقبه روح دش انت
وطبعاً كنت آخر واحد وحسيت روحي ثقيل عليهم صراحة لأنهم كانوا يبون يمشون تخبرون ويكيند هههه
المهم ركبت الكورولا2007 ,وقعدت احوس بالمناظر ولبست الحزام وأعشق الغير ونزل الهاند وقعدت اسولف وياه وجذيه عشان اخفف التوتر
افتريت في شارع الإشارة الطويل اللي في المدرسه ,,ووداني الريوس وضبطتها ولله الحمد ,وعقبها إلا يقول اطلع برع ,هنيه استانست قلت في قلبي خوش هاي حده مستعيل ويبي يفتك مني
المهم طلعنا برع ,وانه على راحتي منضبط يعني
وإلا يقول لي سرع سرع روح
هنيه جان اعطيه التعشيه وأطلق عنان وكربون الكورولا هههه
ولله الحمد رجعنا عقب المدرسة وقال لي امش وياي المكتب هنيه شوي واضمه من الوناسه ههههه
كان انجاز بالنسبة لي كمن أول تراي
والحمدلله طلعت الليسن في نفس اليوم واستلمت الأكورد
​

 

[ام نوره]

عااد بقول لكم سالفتي اني قصيتها شهر 6 بعيد ميلادي وتدربت بنفس الشهر
اول ما ركبت الا تقول لي قومي بطلت عيوني وين اقوم بعد تقول لي مشي ومستانسه حدي اني يازعم امشي
المهم مني مناك بالريوس معاناه الله واكبر اليسار اعرف له واليمين لا
وجان ادخل تراي ويه بومه ماصار لي خمس دقايق الا رسبت اقول لها حقويه تقول لي دخلتين رون سيد اقول لها بس خطا واحد وجان اصيح واخد الدفتر وامشي
وتراي الفاني الصبح احارس بديك الحجره الرعب جان اسمع اسمي يقوله رجال بمكتب 9 جان امشي واشوف رجال واقف لي قال لي انتي ..... قلت لها اي قال حياج
ودخلت واني ميته من الخوف وكالحين ابند هالسياره بس نجحت وافتكيييت
الفال للباقي

 

[warm snow]

هههههههه قصص جميلة

بعد شوي بنزل لكم قصتي الجميلة

 

[warm snow]

بسم الله نبدي قصتي

بما ان ابوي الله يخليه يعرف كذا مدرب ما يردون طلب لابوي
فكنت مرتاحة من ناحيه المدربين .. واخترت المدرب الي درب ابوي وامي واخوي
<< كان اتفاق ابوي معاه ان اول يوم تدريب لي يكون اخر يوم امتحانات نهائية لي في توجيهي ..
والمتفق عليه المدرب يجي ياخدني من البيت ويرجعني لما اخلص البيت ..
الموهم ذاك اليوم طايرة من الفرحة .. وجاهزة قبل ساعه من وقت التدريب ..
لما جت حزة التدري بسمعت صوت الهرن وطلعت وبكل ثقة رايحة امشي
بركب السيارة من بالباب الي جنب السائق
ولكن فجأه اشوف المدرب قاعد هناك ومكان السائق فاضي
قال ليي يالله اركبي يا بتي شغلي السيارة يالله ..
اقول له لحظة انته بتخليني اسوق من البيت اني ما عمري مسكت سكان سيارة عشان تخليني اسوق من اهني
واهو قاعد مستريح ويشرب جاي يحارسني اشغل السيارة واني حتى مو عارفة اشغلها
<< احسب المفتاح نفس مفتاح باب البيت لازم نفره كامل هههههههههههههههه << اشوه لحق عليي
االموووهم ظل يقول لي سوي جدي جدي واني مو مصدقة خبر ...
يقول لي ضغطي ريس .. ادوس الريس كامل وهو تطلع روحه
والمصيبة اني مصره اسوق بأيد وحده .. وهو يقول يا بتييييييييي بأيدش ثنتينهم << اني مسويه روحي كشه بأيد
..
مرت ايام التدريب على خير
..
اول تراي دخلته
دخلت معاي مروره شايفه عمرها
ركبت وياي وطلعت علبة مكياج وكلينس وتحوس في وجهها
واني كنت اسوق تمام التمام لما طلعنا برا السكول
لما كنت اسوق برا .. شوي الا اشوف ايد تمسك ايدي
طلعت روحي من الخوف انزهقت فريت السكان كاااااااامل
شوي واركب على رصيف الدوار .. لكن تفاديت الوضع
جان تصارخ تقول لي شفيييييييييش
اقول لها حقوي تجودين ايدي :
المهم في النهاية : رجعتني المدرسة نجحتني داخل المدرسة لكنن برا رسبتني
وما خلت سبب في الورقة ما كتبته

..
التراي الثاني دخلت معاي مروره لكن لطيفه حدها
وعلى طول طلعتني برا وكل الامور تمام
ونجحت عباره
كان ثاني ايام عيد الفطر
<< لا تستغربون ثاني ايام عيد الفطر
موعد التراي طلع لي بالواسطة
​

 

[♑•.мзŗмăįԀ]

هههههه موضوع حَلو .. /

قَصتي : اني خلال شَهرين كنت اتصل لمَدرب عَبالي مَدرب ثاني ..
فيوم رحت اودي ليه دَفتري الا انصدم انه مَدرب ثاني
وطول الوَقت البابا يناديه ابو فَلان .. جان البابا يبلع ريقه وينصدم مثَلي

طبعا كانت من اشد ايام حَياتي مللَ لان يدَربني كله ستَ الصبح ..والنومه تَصفع فيني
واحَيانا افَهي .. والجَو بآرد ..

طبعا تراي الآول رَسبت والمَدرب خذاني بالطيَب ..
الترَاي الثاَني .. زَفاني !!! وقآلي مامنج فآيده ..

وانه عَصبت عليه .. وقلت له اذا ماتصَلت فيك باجر ماخذه الليسن
لآتَدربني .. واَعتبرتهَ تحدي ..

وَرحت طول الليل ادَعي ام البنين ماتَخيبني ..
واكيد ماَخيبَت املي فيها ..

وجان يدش وياي مَرور فَله .. يسوق عنَي ويسَولف ..
يقول لي الاول بَشنو راسبه وقلت له
وقالي الثاني .. وَقلت له ..

يقولي والثالث ؟ جان اضَرب بريك قوَي قلت ليه رَسبتني ؟
الا يقول حقَي انتي شنَو تَبين ؟
قلت له انت وَضميرك
وجان انجح واتصل في المدرب .. واعَطيه البِشَاره وابط عَيونه
واقوله اني َ قادره اسوَي هالشي ..
فماعَليكم من تحطيمآت المدربين

اهم شي تاخذون الليسن .. وهم بالطَقاق ..

 

[نجمة تشرين]

خخخخ قصصكم فن
بس استغربت من شغله
شلون المدربين يخلونكم بروحكم في الريوس
اني كان وياي
و اصلا كنت احب الريوس كان لعبة
بس اوصل للعمود الف
او للحجرة
هذي المدرب علمني عليهم عشان ما اخربط
علمني بالمنظرة لكن علمني حيلة في المدرسة اماكن من يوصل جتفي ليهم و هم يا اعمده يا حجرات كبار الف
و من جذي يصير مضبوط
بس ما خلاني بروحي

 

[Mohmd]

لما اسمع معاناة الناس >>خصوصا ربعي الحين<< ويه هالتدريب
كل اللي اسويه اقعد اتشمت
انا عيد ميلادي شهر 3 لكن ما طلعت الكجه لان مدرسة (وحاجات اخرى )
انتظرت العطله .. جان اسال واحد صاحبي عن المدربين .. وهالصاحب كلم واحد صاحبه كان يتدرب عند احد المدربين .. كلمه وقال ليه خله يتصل ليي الخميس >>> يعني كلش كلش كلش ما تعبت وانا ادور مدرب >>> اصلن انا ما دورت
كان يدربني على ساعة .. تدربت 6 ساعات ودشيت تراي اول (رحت اقص التراي الا تقول ليي تبي التراي باجر !!!!! انا بعد اول شيفكرت روحي ما سمعت عدل.. وبدون أي نقاش قلت ليها اي )
رسبت ... وتدربت 6 ساعات غيرها ودشيت التراي (عاد هالمره التراي عقب 19 يوم )
نجحت ولله الحمد

يعني من قصبت الكجه للين ما اخذت الليسن ما كملت شهرين ​

 

[the life]

ذكرتوني بموقف

كان المدرب كله يتطنز علي يقول انتين ما يأكلونش بيتكم ؟
حتى الهاند بريك ما تقدرين ترفعينه
وتبدلين بصبعتين ع قولته ههه يقولي في احد يبدل جذي؟
عاد هو الله يهداه كان متين ماقدر اقوله شيل رجولك مااعرف ابدل منها وانطم واسكت
وكله ينط ع السكان ما يخليني اعرف اسوق
مرة كنت لابسه عبايه شوي ايدها واسعه ويجي هو يحط يده واني الف السكان
جان مااشوف الا ايده متشربكه في العبايه هههههههه هو يسحب واني اسحب ابيها تطلع مادري شلون شربكها هههههههه
فطست عليه من الضحك
يقولي انتين الله يعين بيتكم عليش طفرته طلعت له قرون ​

 

[أزهار الخلود]

حليو الموضوع يذكرنا بأيام التدريب شوي شكرا قسمومي
اول شي اني اخذت مدرب لأن قلت ما بحصل مدربة بسهولة فعادي مدرب بنت خالي
وبنت خالتي واختي تدربوا عند هالمدرب صار مدرب العائلة
اول ما دربني حسيته شرحه اوكي وكنت كله اسأل يوم دخلت اول تراي قلت ليه
استاذ اني برسب ما اعرف لا للريوس وعندي اسئلة وايد الي قام يقول لرفيجه اهيه
واثقة من روحها بترسب وصج للريوس ما عرفت 3 مرات سويت وتالي خلتني الشرطية
اكمل استغربت لازم ترجعني فمشيت والأشارة قف خخخ غبية بدرجة تالي في التراي
الثانية كلش هادئة في الأسئلة ما قمت اسأل لأن خلصت اسئلتي يعني
توقعت اني انجح والمدرب بعد توقعني انجح فدخل وياي شرطي الي اقول ليه الهندبريك
وايد خشن ما اقدر ابدل شلون هلون الي يقول اصلا انتين خايفة اني اوردي متعودة مدرب
وشرطي يعني نفس الشي نجحت في داخل المدرسة بس برع يوم طلعت في نقطة ما
قال لي المدرب عنها اني لو ما كله اسال انجان ما اعرف شي لأن المدرب كله في التلفون
هذا الشارع الي نطلع من المدرسة كانت الشاحنة بعيدة تقريبا يعني يمديني اسوق
بسرعة واطلع توني بطلع الي اقول لي الشرطي يعني يميج تطلعين قلت ليها طبعا بس ازيد
السرعة له والشاحنة بعيدة قال لا ودخلني المدرسة قال لي ما علمج المدرب لازم الشارع خالي
تالي تطلعين ما قال لي بهالنقطة من جذي رسبت وقمت اصيح بس في التراي الأول ما صحت لأن
دخلت وعارفه روحي برسب وكان بعد كله يسافر وفي التراي الثالث غيرت المدرب وكان عصبي وايد
افف كنت قبل التراي كله اسوي اخطاء ولما دخلت التراي الثالث دخلت وياي شرطية بس كان برع المدرسة
ولفيت بس ع الدوار ورجعت ونجحت
استانست وايد

 

[قموووورة]

خخخخ قصصكم فن
بس استغربت من شغله
شلون المدربين يخلونكم بروحكم في الريوس
اني كان وياي
و اصلا كنت احب الريوس كان لعبة
بس اوصل للعمود الف
او للحجرة
هذي المدرب علمني عليهم عشان ما اخربط
علمني بالمنظرة لكن علمني حيلة في المدرسة اماكن من يوصل جتفي ليهم و هم يا اعمده يا حجرات كبار الف
و من جذي يصير مضبوط
بس ما خلاني بروحي

نفس الحركة كآن يسويها ليي المدرب في الريوس على سالفة الاعمده والحجآرة
بس صدق صدق المدرب مللني كرهني في عيشتي ,, يآخذني من البيت يروح يقضي مشاويره فيي ما تظل خضره اله يروح يشتريها ولا بنية يروح يوقع دفترها

وأحسن شي آخر ترآي قصيته الظهر ويوم ثاني دخلت ونجحت ويوم اليي ورآه طرت إلى مدينة الرسول

 

[أزهار الخلود]

ع فكرة انه بعد يروح عندي المدرب وقت الريوس ويخليني العب بالسيارة بروحي واهوه
يروح يبصط مع ربعه لأن اقول ليه ما اشوف الجامة الي صوبك ما اعرف جذي
اريوس واهوه فهمها وقام كله يقوم في الريوس علشان آخذ راحتي له
اذكر مرة ركبت ع الرصيف عصب خخخ

 

[موج هادي]

اكره ايام .. ايام التدريب ..

قرررف من قلب ..


في البداية .. زهقة .. بعدين تمللت من التدريب ..

كانت تدربني ساعتين الا ربع ..

كنت اتدريب الساعه خمس الصببح .. وفي شهر رمضااااان بعد

كنت عاقلة ايام التدريب .. فـ ما عندي مواقف محرجة ..

واخذت الليسن يوم مولد الامام الحسن ..




​

 

[m.g.s]

الصراحة الموضوع للفرفشة

اقرا قصصكم و اضحك

كل واحد عنده سالفة غير ​

 

[عآفك الخآطر]

سوالف الليسن ماليها حل , ! كل واحد وسالفته

وعلى قد مايكون الواحد متحمس لين "قرب يطلع كجه" على كثر مايتملل ويتأفأف لين بدى يتدرب .

انا واحد قصيت كجه مني , وبديت اتدرب , لكن كان يجيني في الاسبوع مره , وهالمره تكون الساعه 5 الصبح 6 الصبح .


عاااد وصلت 8 ساعاات جذي , وانا هالرجال رايح ليه من صوب واحد خليته يوقع الباقي ورحت قصيت تراي ,

قبل الترايات مو مثل الحين سبوعين ويعطونك , كان تقريبا من الشهر وهو رايح , فكنا ننتظر هاليوم نطره .

ويوم وصل يوم ترايي الكريم , تأخرت عن التراي خمس دقايق ! جان يأجلونه لي , يعني كأني خسرت تراي اول . :sly:

عاد دخلنا التراي عقب فتره من الاولى , رسبني , ماكاااان عندي اغلاط , لكن رسبني !!! حتى سألته ماقال لي شنو غلطي
ولا قال لي اي شي , قال لي كلمة وحده , تبي تنجح بدل مدربك !! اصلا انا كنت ادري سمعة المدرب موب اوكي هناك لكن مو لهالدرجة
رحت كلمتهم داخل وجدي محد سوى لي شي وكل واحد قام يقطني على الثاني ولين مامشيت

بعدين صدق بدلت المدرب , ودربني ساعتين ودخلت , وحتى ماكمل وياي اللفة المرور نجحني , لان سبحان الله اهو نفسه الا دخل وياي اول تراي .
وبعدين قام يقول لي ان المدرب الاولي معروف ان يمشي من دون مايدرب وجدي , وهم مراقبينه ومن هالحركات

لكنها عدت

 

[qassoomy]

هههههههههههههههه موتوني ضحك

<< هل من مزيد من القصص ؟

 

[m.g.s]

هههههههههههههههه موتوني ضحك

<< هل من مزيد من القصص ؟

+1

 

[لؤلؤة الخليج]

ويلــــــــــي على الأيام الي راحت ...

اني الحمد لله ما عانيت في شي اسمه ادور مدرب

يوم عيد ميلادي قلت لابوي اني بطلع لي الكجة قال لي انتبهي لامتحاناتج المنتصف ولما تخلصين النهائي افراج عيد ميلادي كله فيه امتحانات منتصف وبسمدري متى بيتغير هالنظام البايخ ..(( بس سنتها كان احلى عيد ميلاد سويته لي كل الربع وكل بنات الصف وكل العيلة حضروا حسيته خطوبة مو عيد ميلاد ))

اول يوم خلصت امتحانات النهائي ركييييض على المدرسة قاصة الكجة وامي كلمت ولد خالي قالها اوكي على اسبوع الجاي ويلي ويلي منهو قدي
الا اسمع انه سافر ايران :tears: واحين ويش اسوي واني افوشر على الربع ..!

المهم ما طول في السفر ورجع يمكن عقب اسبوعين ,,
جا لي الساعه 2 الظهر عند بيتنا واني بموت من الجوع من الزهقة بلا ريوق ولا غذا ..
طلعت ووقفت يمكن ربع ساعه اطالع السيارة متحيرة وين بركب .؟ يعني اركب قدام وياه.؟ ولا اقعد ورا ..؟ ما عليكم مني مو متعوده
فتح الباب الا يقول لي تعالي اركبي ..
ركبت وقعدت لاصقة في الباب والخوف باين على وجهي ومرتبكة
هو لاحظني فقام خفف علي وقام يسولف ويسال ويش اخبار عمتي ومتى بيسافرون ومن هالكلام ..

وداني على البحر علمني اجزاء السيارة وشلون اذا بضرب بريك وعنده مجسمات للشوارع وقام يشرح ما شا الله عليه تعليمه فضيييع
ولف بي مرتين وتالي قال يلا نتبادل ..
قعدت لاول مرة خلف السكان مع القليل من الخوف الذي تلاشى مع اول خطوة للسيارة
وقمت امشي واخفف وما شا الله علي بعد
قال لي انتي تمشين من قبل مو مصدق انها اول مرة اجود السكان

عاد ايام التدريب كانت متنوعة ساعات من الصبح كلش او الظهر
وانه مزاجية وهو اكثر مني مزاجي
يوم الي يجي مرتااح عساني ويش اسوي مايقول شي
ويوم الي يجي معصب عساني صكيت الباب بقوة شوي يعصب
واني يوم الي اسوي الغذا حلو استانس واسوق شحلاتي "" عبارة امي مسافرة وانه ربة البيت""

والريوس كنت اعشقه حتى هو كان مستغرب يقول البنات عقدتهم الريوس انتي ما شا الله اوكي ولا تعبتيني

طبعا ما كنت بدعم احد لو شي بس اللهم في الهاي ويه اذا برجع البيت اذا يخلني اتجاوز بالوسط ما ارد ارجع يمين الا اذا قال لي وهو يباني ارجع بروحي اذا سمحت لي الفرصة
وطبعا دوار الفخار ما عمري رحته الا لازم وياي شاحنه او باص كبير
ومرة وحده بس طلعت على واحد وعفس علي الدنيا


اول تراي :
ركبت وكلي ثقة بالنجاح وحتى المدرب قال لي ضمان انتي ناجحة
عاد حظي فقر ركبت ويا وحدة تخبرتني ويانا شرطي قاعد ورا في السيارة يختبرها :mellow:
وتعرفون البنات اذا حبوا يطلعون عضلاتهم على احد يصيرون ....
اول ماركبت السيارة يقول لي الشرطي اعتبري نفسج تمشين بالفريج
قلت لها افا عليك انه قدها وقدود وهذه اول مرة اشوفك واخر مرة بعد
ماشفت الا وحده فاصخة كبوسها بحمق :mellow:
وقالت يلا مشي ..
عاد هي حقيرة كانت تضرب بريك من عندها .. وتقول لي اذا بتضربين بريك كامل ضربي معاه كلج
عاد اني سكت عنها مرتين الثالثة الا اني اقول لها اني لحين ما ضربت ولا بريك :sly: فهم الحجي الي ورا انه هي الي تضرب من عندها
طبعا ودتني الريوس وكان من اول مرة صح
وكل مكان ودتني تبي تصيد غلط
الا في الاخير رحنا يم الدوار الي يطلع ع المدرسة هي قالت يسار <<<يعني راسبة
بس لاني مو حاطة الشي في بالي ابدا فكاني ما سمعتها وسيدة بطلع من المدرسة الا ضاربة بريك حدها ومعصبة وماخلت كلمة يا سمخة ما تسمعين وانه لحين مو مستوعبة
نزلت اركض ورا الشرطي اقوله شنو الي غلطت فيه قول .. وهو يرد علي تيسري بنتي الله يوفقج
:tears:وقتها حسسيت بالظلم ورجعت اصيح واتصل للمدرب الا يقول لي تمزحين وياي ليش رسبتين ..!!!!

التراي الثاني : مع شرطي
رحت بركب السيارة الا صوبي وحده يمكن 5 مرات تشغل السيارة وترد تبند عليها
عاد اني شغلت السيارة ومشيت و الشرطي يطالع الاوراق ويقرا يقول رسبتين في تراي واحد
ماشاف الا وحده تصيح ومن الدموع صرت ما اشوف وهديت السكان
ويعصب علي : بغيت تقتلينا شبلاج انتي ,.. انتي تمشين اوكي شلي يخليج تسوين جدي
واقعد اصيح له انه ما توقعت ارسب في التراي الاول وجاية ونفسيتي مو مستقبلة اني اجي لانه لحين ما استوعبت اني رسبت في الاول
ولاول مرة اشعر بطعم الرسوب اني طول عمري في المدرسة ممتاز و لا رسبت في شي
الا يقول هدي هدي شفيج عبالج كل المرور الي هني ناجحين من اول تراي وشي عادي هذا انه ناجح من 3 تراي و المدرسة شي وهني شي غير
شقيت له حلقي الا اني اقوله عجل لا تكتب لي راسبة
مايصير حجية لازم اكتب
....

التراي الثالث:
طبعا ماسويت حركات الجهالوا لا كتبت في مسن ولا قلت لاحد حتى بيتنا ما قلت
طلعت من جامعة الصخير واركب في باص المدينة ويوم وصلنا صوب المدرسة خليته يوقفني ونزلت
وادخل امشي مشي على ما وصلت الحجرة الي ينتظرون فيها وكان شبه الشمس الساعه 12 وصلت خلقة ناشفة
الا منادي اسمي وانه باقي تقريبا نص ساه بعد على التراي
ورحت له يقول لي تبين تدخلين احين
اذا بتنجحني بدخل من احين
قام يضحك ودخلني
يسولف ما خلا شي الا ساله ويش تدرسين وفي اي جامعه وشنو تبين تشتغلين و في وين و ماخلا كلمة
ولفينا لفة في المدرسة وبره لفة
واحنا راجعين ولا كانه امتحان ولا غيره
يقول لي مجاهده جاية من الجامعة لهني قلت له اي وبرد ارجع لانه عندي محاضرة الساعه 2
وطبعا نجحت و يوم ثاني رحت اخذت الليسن ويالها من نهاية سعيدة لم تكن في الافلام فقط

بس سوالف ما بعد الليسن احلى

لي عودة لحكايتها

وألف شكر لك قسوومي