الأسئلة المحرجة او المنفرة في المقابلات الزوجيه

[عبير البنفسج]

السلام عليكم،

طبعًا أنا أعدُّ المقابلة أمرًا أساسيًا لرؤية الطرفين لبعضهم البعض، وليس لاكتشاف الشخصية أو ما شابه ذلك، يعني بالعامي احنا لما نجوف أحد سبحان الله من أول نظرة يا نرتاح أو نحس بنفور، وهذا الأساس من المقابلة + الصبي ينظر النظرة الشرعية للبنية وكذلك البنية تجوفه طويل متين ضعيف قصلة جحتلة، أما غير هذا فالأهل يتكفلون بالبحث والتنقيب عن أخلاق البنية أو الصبي

​

اختلف معاك في بعض النقاط ، الاهل صح ليهم الدور في انهم يشوفون اخلاقها وانت بتشوف الشكل وما الى آخره وممكن تحس بالاتياح

بس ما اعتبره كفاية ابدا

كمثال : قبل سنة تقريبا واحد قال يبي يتقدم ليي، كشكل ابدا ما عليه كلام و كأخلاق من المستحيل احد يقول عنه شي مو زين

و ارتحت ليه بصراحة ، بس بحكم انه في الجامعة شفته شلون يتكلم وشلون يفكر وشلون يتصرف مع الامور الي تصادفه يوميا

ماليها علاقة بأخلاق ولا سمعة ولا شكل وانما اطباع و شي فيه ما يقدر يغيره

بالنسبة ليي ، مستحيل اتأقلم ويا واحد يتصرف مع الامور الي تواجهه بهالطريقة و في اشياء حتى لو حاولت تغيرها ما تتغير

فلو اني موافقة عليه قبل لا اشوفه في الطبيعة شلون يتصرف و يتعامل ويتكلم ، كان الحين اني في مشكلة و ورطة بعد لأنها حياة طويلة اني تمنيت

يشاركني فيها شخص بأشياء اساسية حاطتنها في بالي

الاخلاق و الارتياح من اول مرة و الشكل ما يضمنون ليي ولو بنسبة 80% سعادة

 

[ندآآء السمآآء]

السؤال عميق اكيد .. لكن مو شرط تكون مستعدة تجاوب على سؤالك .. يعني لما تقولي لازم تعرف هالأمور من البداية
ممكن تكون اعدتت كذا و كذا و كذا .. أو بضيغة أخرى تقولك انها على رابطة قوووية بصاحب الزمان سلام الله عليه
و في الواقع شي ثاني ! انت ما تضمن
مسألة تطلع مسيرة أو لا ... يكفي تقولها انا مابي وحدة تطلع مثلاً .. و بتوصلها المعلومة لو كانت تطلع بتناقشك و لو كانت لا بتقولك اني اصلاً ما اطلع
يعني الشي يكون صريح و مباشر .. المقابلة مو شرط تكون اسئلة كأن في امتحان .. المقابلة عشان الواحد ع الاقل يرتاح للطرف الآخر لو كانت كلها اسئلة جذي
صار امتحان مو مقابلة زواج و الشي ممل .. يعني مو شرط لما تقول لا ما اطلع معناه ان هي ما تطلع واجد يطلعون من ورى اهلهم مو ازواجهم بعد .. و يمكن العكس
و بالنسبة لسالفة الموت .. يجيك واحد عقليته حليوة بعد ! لما تقوله لا مو مستعدة يقول في خاطره والله شكلها مسوية بلاوي !!
ولا يمكن هي تتوهق في هالسؤال و ما تعرف تجاوب .. طبعاً مو شرط هالسؤال القصد أشياء تعادل هالسؤال او من قبيله ..

فـ يعني المسألة تعارف و لابد تنسأل اسئلة واقعية تتعلق بحياتهم لو كانت دينية او سياسية أو اياً كان بس المهم تكون اشياء واقعية
يعني بالنسبة للسؤال الأول ماذا اعددتي .. البعض ما يحب ينسأل هالاسئلة لأن الشي مثل ما انت ذكرت عمييييق .. يمكن ما تقدر تقوله أو ما تبي
بس لو قلت لها شـ علاقتش بـ الإمام المهدي .. مصاحباً لسؤالك ابتسامة جميلة تحسسها انك متفتح دينياَ .. ترتاح لك على طول و ممكن تقولك كلمة وحدة بس
( انتظره / اتمنى اشوفه / اتمنى ما اكون ابكيته يوماً .. الخ ) .. الطريقة و صيغة السؤال مهمة جداً .. ​

 

[UOB-BH]

اني كنت اقصد هالنوع من هالاسئله
يعني ممكن يقول لها انا انسان متفتح وأأيد المرأة تشتغل وتدرس و تسوق
ومن يعقد عليها يقول لها لا مافي ماعندنا نسوان يطلعون برع البيت !

قمه المادري شنو !

ياريت السؤال الاول قادر على بناء علاقة أبدية ناجحة لكان الامر بغاية السهولة، فالمعظم تكون اجابته صريحة وواضحة في هذه الأسئلة.
من خلال ملاحظتي في دائرة معارفي معظم المشاكل المستقبلية تصير بسبب السؤال الثاني وأنواعه، أسئلة صعب على الشخص اجابتها بسلبية في المقابلة ولكن صعب أيضا على الطرف الآخر اكتشافها وتخمينها إلا بعد التعامل مع هذا الانسان لفترة أطول والوصول لمداخل شخصيته لتتضح له شيئا فشيئا. قناعتي تقول أن فترة المقابلة كانت نصف ساعة او ساعة هي فترة غير كافية لاجابة الأسئلة من نوع السؤال الثاني بما يعطي تطمين للطرفين ببدء حياة أبدية.

لحد يفسر اجابتي أنني أشجع على شي آخر هناك دائما حل وسط.

 

[UOB-BH]

كمثال : قبل سنة تقريبا واحد قال يبي يتقدم ليي، كشكل ابدا ما عليه كلام و كأخلاق من المستحيل احد يقول عنه شي مو زين

و ارتحت ليه بصراحة ، بس بحكم انه في الجامعة شفته شلون يتكلم وشلون يفكر وشلون يتصرف مع الامور الي تصادفه يوميا

ماليها علاقة بأخلاق ولا سمعة ولا شكل وانما اطباع و شي فيه ما يقدر يغيره

بالنسبة ليي ، مستحيل اتأقلم ويا واحد يتصرف مع الامور الي تواجهه بهالطريقة و في اشياء حتى لو حاولت تغيرها ما تتغير

فلو اني موافقة عليه قبل لا اشوفه في الطبيعة شلون يتصرف و يتعامل ويتكلم ، كان الحين اني في مشكلة و ورطة بعد لأنها حياة طويلة اني تمنيت

يشاركني فيها شخص بأشياء اساسية حاطتنها في بالي

الاخلاق و الارتياح من اول مرة و الشكل ما يضمنون ليي ولو بنسبة 80% سعادة

هذا اللي أقصد بالضبط
الشي اللي أطلقت عليه عبير مسمى (الأطباع) صعب جدا اكتشافه لو كان هذا الشخص مو معاها بالجامعة وكانت تلاحظ فيه هالأطباع اللي ممكن هو مايدري بوجودها فيه لو سألته في المقابلة.

ماهو الحل؟
لا يوجد شيء محدد، الامر محيّر، معقد، والاختيار السريع صعب جدا.

 

[ولد عمران]

دايماً يسألون الصبي شنو مؤهلاتك, شنو بتقدم لزوجتك
لكن محد يسأل هالسؤال حق البنية

 

[sanabsy 15]

اختلف معاك في بعض النقاط ، الاهل صح ليهم الدور في انهم يشوفون اخلاقها وانت بتشوف الشكل وما الى آخره وممكن تحس بالاتياح

بس ما اعتبره كفاية ابدا

كمثال : قبل سنة تقريبا واحد قال يبي يتقدم ليي، كشكل ابدا ما عليه كلام و كأخلاق من المستحيل احد يقول عنه شي مو زين

و ارتحت ليه بصراحة ، بس بحكم انه في الجامعة شفته شلون يتكلم وشلون يفكر وشلون يتصرف مع الامور الي تصادفه يوميا

ماليها علاقة بأخلاق ولا سمعة ولا شكل وانما اطباع و شي فيه ما يقدر يغيره

بالنسبة ليي ، مستحيل اتأقلم ويا واحد يتصرف مع الامور الي تواجهه بهالطريقة و في اشياء حتى لو حاولت تغيرها ما تتغير

فلو اني موافقة عليه قبل لا اشوفه في الطبيعة شلون يتصرف و يتعامل ويتكلم ، كان الحين اني في مشكلة و ورطة بعد لأنها حياة طويلة اني تمنيت

يشاركني فيها شخص بأشياء اساسية حاطتنها في بالي

الاخلاق و الارتياح من اول مرة و الشكل ما يضمنون ليي ولو بنسبة 80% سعادة

شلون بتعرفين طريقة تفكير شخص من خلال مقابلة مدتها فرضًا فرضًا نص ساعة أو أكثر ؟ طبعًا أنا ما نسفت فائدة المقابلة ومثل ما قلت المقابلة كفيلة في كشف بعض الأمور من البداية، والمقابلة على فكرة إذا ما كان فيها فن في طرح الأسئلة ما تكون ليها فايدة، ما أعتقد في هالمقابلة يقدر الواحد يكتشف كل إيجابيات وسلبيات الشخص
​

 

[sanabsy 15]

ياريت السؤال الاول قادر على بناء علاقة أبدية ناجحة لكان الامر بغاية السهولة، فالمعظم تكون اجابته صريحة وواضحة في هذه الأسئلة.
من خلال ملاحظتي في دائرة معارفي معظم المشاكل المستقبلية تصير بسبب السؤال الثاني وأنواعه، أسئلة صعب على الشخص اجابتها بسلبية في المقابلة ولكن صعب أيضا على الطرف الآخر اكتشافها وتخمينها إلا بعد التعامل مع هذا الانسان لفترة أطول والوصول لمداخل شخصيته لتتضح له شيئا فشيئا. قناعتي تقول أن فترة المقابلة كانت نصف ساعة او ساعة هي فترة غير كافية لاجابة الأسئلة من نوع السؤال الثاني بما يعطي تطمين للطرفين ببدء حياة أبدية.

لحد يفسر اجابتي أنني أشجع على شي آخر هناك دائما حل وسط.

لهذا أفضل شيء خصوصًا في بداية الزواج هو التنازل في بعض الأمور وجعل مبدأ - خذ واعطِ - أو - خذ وهات - عشان تمشي الحياة لين يفهون بعض، والحب والود أساس كل شيء​

 

[غصن شوك]

دايماً يسألون الصبي شنو مؤهلاتك, شنو بتقدم لزوجتك
لكن محد يسأل هالسؤال حق البنية

احس السؤال مو مؤدب ههه .. يعني اوك ممكن اسئل صبي شنو مؤهلاتك .. بس اني اسئله شنو بتقدم لزوجتك !
صعبه شوي يعني .. << تحسسني الي سألت كأنها تقول لك شنو الشيء الي يخليني افضلك عن الاشخاص الي تقدموا ليي ههه

اما اذا صبي سئل شنو مؤهلاتي .. اول جواب بيخطر ع بالي اني مخلصة ثانوية عامة هه وادرس محاسبة في الجامعه
اما اذا سئلني شنو بقدم له كزوج .. بقول له اول شيء الاحترام .. الطاعه اذا كان الشيء فيه رضا الله .. بربي عيالك تربية صالحه << يعني الاشياء الي واجبه عليي كزوجه في الاسلام بسويها ..

 

[أشواق الروح]

السالفة مو بتلك الصعوبة
يمبي لها صدق وعفوية بس
​

 

[غصن شوك]

السالفة مو بتلك الصعوبة
يمبي لها صدق وعفوية بس

صح بيكون بداية الشيء ارتباك .. بس لزمن اول شيء يحاولون يهدون ويلطفون الجو .. ويكونون شفافين وصريحين وصادقين

 

[رَحِيـــقْ !]

بالنسبة إلي ، أجد أن الفترة المحدودة قد تعكس بنسبة أكبر .. أسلوب الطرف الآخر في الحوار ..
وقد تدلُ نوعية الأسئلة على فكر الشخص أكثر من إجاباته ، كما أسلف البعض ..بأن الإجابات على الأغلب تتصف بالمثالية ..
الأمر الذي يتطلب من المحاور استكشاف ما وراء الاجابات .. وهذا ما اتبعه دومًا .. برأيي التفاصيل وما وراء السطور أشَّفُ
من ظاهر الحديث لشخص مبهم كبداية ..

بمعنى أوضح :
لو كانت الأسئلة .. فلنفرض من الفتاة ..كالتالي ..
ما نوع سيارتك ، كم راتبك ، ما هي شهادتك أو مستواك الدراسي ، من أي الأماكن تشتري ملابسك ..
أستطيع الجزم حينها بأن هذه الفتاة تنظر للمادة كجزء رئيسي .. ونوع الأسئلة أيضًا .. ومدى أهمتيها
قد تعكس ثقافة المرء من سطحيته ..

لا زلتُ أحاول البحث عن الأسئلة المحرجة .. ولم يستحضرني سؤال لحد الآن ..
ولكن بالعودة لوجهة نظري بتفاصيل الأمور ، من أكثر ما يغيظني .. تلك الإتصالات للخطبة والتي بدايتها ..
" أوصفي لينا شكلش " أجد هذا السؤال منفرًا لي كبداية .. ! أن يبحث المرأ عن المظهر فالجوهر على ذات
الترتيب .. أمر يدفعني للرفض والحكم بالسطحية دون الخوض بالتفاصيل ..

​

​

 

[غصن شوك]

لا زلتُ أحاول البحث عن الأسئلة المحرجة .. ولم يستحضرني سؤال لحد الآن ..
ولكن بالعودة لوجهة نظري بتفاصيل الأمور ، من أكثر ما يغيظني .. تلك الإتصالات للخطبة والتي بدايتها ..
" أوصفي لينا شكلش " أجد هذا السؤال منفرًا لي كبداية .. ! أن يبحث المرأ عن المظهر فالجوهر على ذات
الترتيب .. أمر يدفعني للرفض والحكم بالسطحية دون الخوض بالتفاصيل ..

ههه جبتينها ع الجرح .. ام المعرس تتصل وتقول اوصفي ليي شكلش !
انت جاي تعرس على شكل ؟! انتين تبين حق ولدش شكل ؟
الرسول صل الله عليه وآله وسلم قال فظفر بذات الدين !
لان كل شيء يروح ويبقى الدين .. المرأة الي الواحد بيرتبط فيها مو ديزان !
هي مربية لأطفالك .. هي شريكه حياتك .. يعني بتعرس ع وحده فقط ع جمال !
هذي سطحيه .. لو مثلاً لا سمح الله احترقت وتشوهت ومستحيل ترجع مثل ماكنت بتطلقها ؟
اختر وحده للجوهر .. لأنها في الظروف الصعبة مابتنفعك بجمالها او ببيزاتها او حسبها او اي شيء ثاني
يعني الجمال يروح .. والحسب والنسب ممكن يتلوثون .. البيزات تروح .. خذها علشان شيء باقي
اخترها من الحين شريكه لك في الدنيا والاخرة = )

 

[Bnt matter]

موضوع رائع
شدني الصراحه لقراءه ارائكم
بنسبه لام المعرس قد تكون هي سبب في عدم الاتياح بحيث انها قد تختار الفتاه على الشكل الخارجي بغض النظر عن الاخلاق ولاطباع و بتالي ينتج عن لا سمح الله الطلاق وايضا تعتمد على صغر سنهاا فلو كانت في 17 او 18 من عمرهاا وهنا تفكير الفتاه لا يكون ناضج مثل لو كانت في 19 او 20 فينتج الكثيير من المشاكل في عدم التفاهم
اما بالنسبه لاسئله فأني افضل الاسئله التي يحاول الكشف عن ما بداخ الانسان (يعني بشكل مختصر تفكيره شلون )
وشنو اهي الاطباع الطرفين فبعض الناس لا يكون هالك تفاهم من ناحيه الاطباع .

تحياتي
بنت مطر

 

[Purity]

حلو الموضوع
وعلى الرغم ان المقابلة ماتحدد كل شي بس هذا ما يعني انها عديمة الفائدة ..
وعلى طاري الاتصالات حدث ولا حرج من المواقف ان الام تسال البنت عن العمر تقول البنت 21 ترد كنا نبي لولدنا 19 -20
قممة السطحية !

 

[the life]

وعليكم السلام

للحين ما جا الوقت اللي ادش فيه مقابله
وبصراحه المقابله يبي لها بنت تعرف شلون تفهم الشخص اللي قبالها

من اللي حواليني والاسئله اللي اسمعها وتبط جبدي

تشتري ثيابش من وين ؟ < يا اخوي شرايك اروح الخياط وافصّل لي ! ؟
لو واحد يقول لـ وحده قرايبش عندهم سياره بيبيعونها شرايش تكلمينهم يسوون لي تخفيض ! :mellow:
لو يقول بشوف شعرش
لان في الف طريقه انه يعرف ابسط شي ان يخلي امه او اخته تشوف وتقوله مو معقوله الوحده بتقعد لابسه الشيله وسط نسوان


وقبل الاسئله وقبل كل شي الاسلوب له دور
يعني يجي واحد يتفلسف ويتكلم انه ما فوقه فوق وكأنه يقولش زين تكرمت وجيت تقدمت لش !
هذا يمكن في وجهه اقوله مافي نصيب :mellow: لاني ما اتحمل هالنوعيه من الناس !


​

 

[miss momo]

وش هلموضوووع الجميل ..
بصراحة من الاسألة المحرجة بالنسبة ليي وصارت ليي في مقابلتي الاولى والاخيرة ... جم معدلش ؟ يعني انت وش يهمك بالمعدل اهم شي الاخلاق والارتياح..
و تعرفين تطبخين ؟ يحاتي البطن .. انزين تعرف زين ماتعرف بتتعلم ​

 

[غصن شوك]

عندي سؤال حق الصبيان

لو انت سئلت البنت انتين تعرفين تطبخين وسواء قالت لك اي او لا
المهم انها اختتمت جملتها ان مو من واجباتي كزوحة اني اطبخ !

شنو بتقول داخلك عنها و شنو بيكون ردة فعلك ؟

اتمنى الشباب يردون ع سؤالي هههه

 

[غصن شوك]

جم معدلش ؟

يمكن كان نيته يكسر التوتر الي بينكم ويدردش .. او يمكن يبي يعرف شنو مستواش
ماحب هالسؤال .. ومابجاوبه بصدق .. يعني الجواب الامثل بالنسبة ليي الحمدلله اهم شيء ماعندي انذارات ولا بنطرد من الجامعه

 

[عيـ الحياة ـن]

عندي سؤال حق الصبيان

لو انت سئلت البنت انتين تعرفين تطبخين وسواء قالت لك اي او لا
المهم انها اختتمت جملتها ان مو من واجباتي كزوحة اني اطبخ !

شنو بتقول داخلك عنها و شنو بيكون ردة فعلك ؟

اتمنى الشباب يردون ع سؤالي هههه

جدي...ما راح اجبرها على امر الطبخ...لكن في الطرف المقابل...راح احط في بالي إن هي ممكن ما تعطيني حقي الا وهو طاعة الزوج...النتيجةإذا الساعة دي قالت ما بطبخ..بكرة بتقول ليي ما بشتغل في ترتيب البيت..صحيح إن إن هذه الأعمال مو واجبة على الزوجة لدرجة إن تنظيف الأطفال واجبة على الأب..لكن إذا دي بدايتها .. ببحث عن وحدة ثانية لإنها ما بتحقق الإستقرار النفسي + ما راح تمتثل إلى امر رضاي كزوج..بينما الإمام الباقر ع يقول ..لا انجح شفيع للمرأة اكبر من رضا زوجها ..إذا نظرت إلى الأمر بهذه النظرة

 

[sanabsy 15]

عندي سؤال حق الصبيان

لو انت سئلت البنت انتين تعرفين تطبخين وسواء قالت لك اي او لا
المهم انها اختتمت جملتها ان مو من واجباتي كزوحة اني اطبخ !

شنو بتقول داخلك عنها و شنو بيكون ردة فعلك ؟

اتمنى الشباب يردون ع سؤالي هههه

كيسا ؟

يعني كل يوم نشتري من مطعم لو نخلي الوالدة تخدمها بعد، هزُلت ​