احترم وجهة نظرك و ما اقول انها غلط بالكامل ، بس بعد ما اتفق اياك 100% ، بالنسبة الى خلك واثق من روحك ، اذا كنت تقصد انه خايف يجيب درجة اكثر مني في ناس عندهم هاذي النظرة ، بس مو هاذي وجهة نظري سواء اعطيته نوت او ما اعطيته كل واحد الله بيعطيه على قد تعبه و مجهوده ، بس بالنتيجة انا قاعد اصنع انسان اتكالي بدون ما احس في حال ان الطالب ما عنده اي شي و عدم حضوره للمحاضرة لأسباب مال ليها معنى بالإضافة كأنك قاعد تقوله الي قاعد تسويه صح !
+
بالنسبة الى تفكير الايتي و العلوم غير عن الاداب و البزنز ، يمكن لان عندنا لابات و انتون ما عندكم
اتفق اياش بخصوص اني اساعده في الله ، بس ان الامور تمشي على هذا النحو دائماً ويش الي بصير ؟
انا وجهة نظري اساعده لله و يمكن ينجح من هالجم نوته ، ما اختلف على هذا الشيء ، هذا في مقرر واحد ، اثنين ثلاثة ... عشرة ؟ فصل ، فصلين ... الى كورس التخرج ؟
مع اني قاعد اساعده لوجه الله ، بس في طلبة يتعودون على هذا الشي انزين ان ساعدته في مقرر من ناحية النوت ، مقررين ، ثلاثة ، خلاص حصلنا فلان او فلانة كل مرة بناخذ من عندهم النوت و ما يحتاج نحضر شنو كونت انا هني؟ هني ان كونت انسان اتكالي من حيث لا اشعر ! انزين شنو الفائدة الي طلع ابها هذا الإنسان ؟ حصل شهادة ؟ هل الشهادة هاذي من تعبه ؟ شنو المجهود الي بذله عشان يحصلها ؟ غاب عن المحاضرات و درس من نوتات زميله ؟ مو قاعد اقول لا المفروض ما نعطي النوت لاحد حتى للأسباب الي ذكرتها سابقاً لكن ما احبذ فكرة ان احد يخلي هذا الطريق اسلوبه ، و مع الاسف هالفئة موجودة ، شخصياً ما عندي مشكلة ان اعطي احد النوت او ارفعهم او حتى اطبعهم لاحد في النهاية الناس للناس ، حتى انا نفسي استفدت من بعض النوت الي يرفعونهم الطلبة احياناً اذا اراجع او احس مو فاهم بعض النقاط من النوت الي انا كتبته ، ارجع الى النوتات المرفوعة في المنتدى احاول افهم من بعض كتباتكم و ملاحظاتكم الموجودة في النوت و احيانا اخذ نوت زملائي يكونون كاتبين ملاحظات توضح بعض النقاط اكثرو اعدل على النوت الي عندي ، اعتراضي مو اني اعطي نوت ، لكن اعتراضي بالدرجة الاولى اني اعطي النوت لطالب ، بيهمل دراسته و ما بيبذل اي جهد او بكون طالب اتكالي لمجرد انه ممكن يحصل نوت من عند هذا الطالب و هاذي الطالبة في اي وقت يحتاجه
يمكن يكون قصدي مو مفهوم او ما وضحت الشيء بصورة صحيحة ، للتوضيح اكثر :
هذا الطالب قدر يكتب و يركز في كل المحاضرات الي هو ما كان اياي بس سبحان الله وقت الي يكون اياي في مقرر ، ما يكتب لان عذره انا ما اقدر اكتب و اركز في نفس الوقت ؟ السؤال هني شلون قدر يكتب و يركز في المحاضرات الباقية ؟ ثانياً خلنا نوقف بينا و بين نفسنا تقريباً ما في طالب يركز 100% و هو يكتب ! الا بعض الحالات النادرة بالإضافة الى الي يحضرون الدرس قبل لا ياخذونه ، بحيث تكون بعض المعلومات الي في الشرح ماره عليه من تحضريه فيقدر يكون مركز نوعاً ما ايا الشرح و في نفس الوقت يكتب ، و في نفس الوقت ما في طالب تركيزه 0% و هو يكتب حتى لو اخذنا بعين الاعتبار ان في فئة من الناس قدرتهم على التركيز في اكثر من شيء في وقت واحد ضعيفة اشوي ، من جهة ثانية كم بتكون كمية الكتابه الي بيكتبها الدكتور على السبورة في حال كان يكتب و ما يستخدم لسلايدات ؟ ثاني شي بعض الدكاترة يكتب على السبورة بعدين يشرح ، فشنو عذر هذا الطالب هني ؟ و في حال كان الدكتور يشرح و يكتب في نفس الوقت فهو في البداية يكتب السؤال ، في فترة كتابة السؤال ما يقدر الطالب يكتب اياه و لو شي بسيط ؟ و اثناء كتابة السؤال الي بعده ما يقدر يكتب و لو جزء من الاجابة ؟ في النهاية ما في دكتور خارق يشرح و يكتب في نفس الوقت و يمسح السبورة بسرعة بحيث ان الطلبة ما يقدرون يكتبون و يركزون و لو بنسبة بسيطة اثناء الكتابة ، لكن في طلبة تتخذ هاذي الحجة ذريعة لانهم ما يكتبون لا اكثر و لا اقل و في ناس صدق انهم ما يقدرون يؤكزون و يكتبون في نفس الوقت فيضطر انه يا يركز اياا الدكتور ، يا يكتب لان سرعته بطيئه في الكتابة او اذا يكتب بسرعة خطه يكون مو مفهوم فيحاول يكتب على راحته بحيث تكون النوت مرتبه و مفهومه بالنسبه له بس جم نسبة هالفئة ؟ ما اعتقد النسبة كبيرة يعني قبل لا نجي في الجامعة كنا في الثنوي و نكتب من على السبورة ، فكانوا ايانا زملاء يعانون من هالمشكلة بس جم كانوا ؟ 1 ؟ 2 ؟ 3 ؟ فإذا اخذنا هالشيء بعين الاعتبار كم بتكون نسبة هالنوع من الطلبة في الجامعة ؟
) وبعد ما أأمن أعطيهم أحد يصورهم من المكتبة..
كيفي ما أبغي أعطيك 
.. المشكلة تنبط جبدك لين واحد يحاول ينجح على ظهرك 
.. 
.gif "AN (11) :AN11:")
