حوار ساخن بين آدم و حواء ....

[Dr.Hakim]

بااال .. كل هذا يصير

كنت احسب الموضوع واجد ابسط من چذي وبعد شايل همه
صدمتوني صراحة

والله ماكو احلى من العزوبية

 

[غريبة الدار]

بااال .. كل هذا يصير

كنت احسب الموضوع واجد ابسط من چذي وبعد شايل همه
صدمتوني صراحة

والله ماكو احلى من العزوبية

الموضوع والنقاش واجد طويل ومتشعب لو بنواصل فيه عادي نوصل 200 صفحه أوأكثر بعد غير بعض الأشياء اللي يصير عليها تحفظ ومحد بيذكرها

هو سالفة نصيب وأرزاق ويمكن بعد شوية حظ وكل شي مقدر ومكتوب

بعضهم الله يكتب ليه وتمشي أموره بسرعه أو بدون تعقيدات وهي يمكن يعتمد على النية (إنما الأعمال بالنيات )والتزامه ويه أهله بآداب الخطبه وأمور ثانيه

وبعضهم ممكن يطول بسسب شروطه وطلباته وإنه مثل ما عنده تنازل في بعض الشروط أو الموصفات أو إنه يكون اختبار لصبر الشخص .............الخ من الأمور الثانية اللي تلعب دور وتأثر

هي حاليا
ربما لي عوده(مع تعليق ) بس عقب الأمتحانات

 

[رَحِيــلْ ،]

بالنسبة لسالفة الحجي على البنية لما تحط روحها في موضع تهمة، أو أي شخص يحط روحه في موضع تهمة.
الزبدة: محّد له شغل بأحد، محّد مسؤول عن أحد، هي تغلط/هو يغلط.. تسكت لأنّ محّد كامل،
وأنا مع مبدأ أن أي إنسان فيه جانب خير وجانب شر، بس الفرق في إظهاره، أو سماح المجتمع له بإظهاره.
إظهار الخطأ ليس مبرر للناس الآخرين من أجل تناقله وجعله محور الكلام.
أي واحد غلطان سواء يعرف أن الشي غلط أو لا هو في موضع بلاء، وإنت لما تجوفه بعد بلاء(اختبار) إليك حق تعطي التصرف المناسب.
وبعد.. هذا الغلطان انت لا تعرف أسبابه، ليش هو وقع في هالخطأ، هل هو عن جهل أو عن تعمد، وهل هو راضي أو لا.. وغير هالأشياء.


ومن ثمّ بعد، أطرح ملاحظة. احنا نعاني من مشكلة أنّ من يصير على الشخص غلط خلاص للأبد يبقى فيه. أكتفي بهذا الاقتباس:

بيراندللو، مسرحية ست شخصيات تبحث عن مؤلف.

أما عن الموضوع اللي عندي حجي أكثر عنه هو الموضوع الجديد مال المقابلات. سأكتب تعقيباتي في الردود القادمة.

 

[رَحِيــلْ ،]

والله ما أدري من وين أبدأ بالضبط..
أصناف كثيرة ما عندها احترام ولا لباقة ولا أدب ولا شيء من هذا القبيل.
بس على الأقل البنية نفسها لا تسمح تحط روحها في هالمواقف.. خل يفهمون أنها ما بتموت على ولدكم، ولا هي ناقصة شي إذا ما ارتبطت.
أني من المعارضين وبشدّة تدخّل أي أطراف ما عدا الزوجين نفسهم في اختيار الشريك!
ومو بس في اختيار الشريك، إنما ما يتبع اختياره كذلك.
أوكي ما أمانع من لفت الانتباه على بعض النقاط، النصيحة، السؤال، المناقشة، الأخذ بالرأي.. بس لا تختار عنّي هذي حياتي.
شخصيًّا لو اتعرّضت لمواقف جدي، أحس روحي من أعرف مباشرةً برفض من دون نقاش، ولو ويش ينقال ليي من حجي، لأني مقدرة نفسي كوني امرأة لي احترامي وتقديري وما أسمح لأحد يعاملني كمادة ويهمل جوانبي الأخرى.
ما أحب لا رجال ولا أهل ينظرون إليي بهالنظرات الماصخة، بصراحة يعني. يا تتقدمون عدل أو لا تتقدمون!

ثانيًا: السالفة مو سالفة أن البنية بتهتز نفسيًا ليش انرفضت، وبتقلل من قيمة نفسها، بالعكس يمكن هو الخسران.
لكن لما تقول ليها السبب أنا رفضتش لهالعيب، بغض النظر حتى لو هو عيب شكلي أو غيره، بتحسسها كأنما اختصرت كل شخصيتها في هذا العيب.
انزين أوكي من حقك ترفض ما قلنا شي، بس اسكت ما له داعي تشرح لينا مبرراتك وأسبابك أو الله ولدنا يبي جدي أو جداك، ما نبي نسمع المعايير اللي انت تبيها ومو قاعدة تنطبق علينا. شنو نسوي لك بالضبط؟

أني ما ينرفزوني إلا اللي يقولون لا يفوتش القطار ولا يروح عنش النصيب.
وش هالعجالة يعني، خلوا البنية على راحتها تفكّر في أن هذا الشخص بتطلع من بيتكم بتعيش وياه، بتأسس أسرة وياه، بترتبط فيه على طول مو يوم أو يومين، الزواج مو تجربة نجاح أو فشل!

وهالقطار اللي تتكلمون عنه، خل يروح يعني وش المشكلة. "مسكينة! ما تزوجّت! الله يرفع حظها!". كلام أعراف يحسس البنية وكأنّ فيه شيء مفقود، كأنّ فيه شيءء ناقص إذا ما اتربطت.
وهالثنائيات اللي خالينها لينا في هالمجتمع: عانس/متزوجة - عزوبي/متزوج. ترا تمللنا واحنا نصنّف الناس، وكأن حياتهم معتمدة على هالتصنيف. ترا ما فيه فرق، فيه إنسان بالداخل، إذا هو اختار هالاختيار، أو إذا هي ما اتزوجت لأيّ سببٍ كان سواء بإيدها أو لا، تبقى حياتها موجودة. المرأة مو كائن مخلوق حق متطلبات الزوج والأسرة فقط. فيها إنسان بالداخل، عندها مشاعر، عندها فكر وعقل، عنده طاقة، عندها إبداع.. أستغرب من الزوج اللي ما يخلي مرته تنطلق في الحياة، ويبي يتملّكها من جميع النواحي! وأستغرب من الأهل اللي يجوفون بنتهم كبرت وصارت "مرة" معناها يلا خل نشجعها تتزوج من أقرب نصيب.

 

[رَحِيــلْ ،]

تحت عنوان نستحي وتحت عنوان اهلنا اجبرونا وتحت عنوان ما نعرف نرد بشده عليهم وغير عنوان الاهل لين عرفوا رفضنا نعطي بالموضوع بيعطونا محاضرة

اللي استحوا ماتوا. في هالمسائل خل "تحاول" تهدّ الخجل. تصرّف ما عجبها خل تعبر عن أنه ما عجبها. خل تتكلم وتفصح ليهم حتى وهي مستحية: مسامحة أني ما أمبي هالشيء يصير!
فيه أشياء يمكن لو اتعرضت لمواقف تصير تنازلات بحكم الموقف.. أو الواحد يسكت ويطنشها ويحطها ورا ظهره ولا كأن صار شي وفي الطقاق اللي يطقه هو وي أهله.

بس سالفة أنّ أدش مقابلة وي أهله أول، هذي مرفوضة.
سالفة أنّ أطرش ليكم صورتي حق تقيمون نسبة جمالي، هذي مرفوضة.
سالفة أنّ أتزوج أهله قبل لا أتزوجه، هذي مرفوضة.
سالفة أنّ الصبي يبي مواصفاتي قبل لا آخذ مواصفاته، هذي مرفوضة.

خل المحاضرات من اليوم لباجر تشتغل. أهم شي ما أحسس روحي بأني بهالرخص حق أقبل بهالإهانات!

 

[رَحِيــلْ ،]

المجتمع خلق هالثقافة

الزواج هني حالها حال تشتري سيارة, تروح السوق, تشوف سيارات ألوان و اشكال و مواصفات, كل سيارة تسال عنها و تشوف اهم مميزاتها و اذا وراها مشاكل, و هل الوكالة مالتها فيها مشاكل او راحة بال؟ اذا كلشي اوكي, نشوف راعي السيارة و يعطيك سعر غالي, انت تقول و الله السيارة زينة بس انا كل إلي عندي هالمبلغ, و تصير المفاوضات و لين يوصلون لسعر و تتم البيعة.

مو احنا المجتمع؟ اللي خلقها يغيّرها. أقل شيء عبّر عن رفضك لهالثقافة الباهتة. أقل شيء التزم باللي يرضي ضميرك بعيدًا عن هالثقافة السطحية.
أرفض المبالغة من الطرفين: الزوج والزوجة. بس أوافق على سالفة تسأل وتبحث وتاخذ قرارك بأريحية.
بس يبقى فرق شاسع بين شراءك سيارة وارتباطك بزوجة. أرفض كلمة الشراء أصلًا على العلاقة..
كلمة الشراء معناها: تبادل منفعة، مادية بين الطرفين، علاقة تحكمها قيمة المال. وداعًا للروح وداعًا للشعور ووداعًا للأخلاق ووداعًا لكلّ القيم الأخرى.

 

[رَحِيــلْ ،]

اذا البنية تعلقت فيه من اول مرة، سوري بس هالبنية ضعيفة شخصية، و يمكن فيها حالة يأس من فكرة العنوسة (اعيد و اكرر بسبب الثقافة الي خلقناها)

المسألة مو مسألة تعلّق خوك ولا ضعف شخصية.. المسألة احترام،

الساخر في الموضوع هالمفارقة العجيبة في ثقافة "العيب" إذا صحّ التعبير:
أنّ البنيّة قامت تنتظر ردّه حق تقرر مصيرها، بحكم أعرافنا الجميلة اللي ما تسمح للبنية تقابل أكثر من شخص وبعدين تختار بينهم، وبحكم أنها قالت: عيب أدخل على شخص ثاني بينما أني في خطبة الأوّل.
وهو بكلّ برود راح يلايم له أكثر من بنيّة، ويدش على أكثر من وحدة، ويجمع مواصفات حق يجوف أنسب وحدة ويتخيّر بينهم، وتاااالي اتفرّغ عقب شهر يرد عليها: لا والله ما فيه نصيب. وهو راح كمّل حياته عادي يعني، بس لأن فيه قانون عرفي: مو عيب يدش على أكثر من وحدة.
مو انزين ممكن خلال هالفترة اللي قاعد يحطها على الويتنغ، كان من الممكن تدش على غيرها وتجوف نصيبها وتكمّل حياتها؟


لا تقول ليي إنّ من حقها هي بعد وبإمكانها تدش على أكثر من واحد وتختار. والله لو تسويها تقوم الدنيا ولا تقعد من الحجي اللي عليها.
ليش؟ لأنّ ثقافتنا مؤسسة على الغلبة لفحولة الرجل، عيب عليها ما تحترمه، بس لما يجي العكس، حلال أنه ما يحترمها، لأنّ احترامها باطل عرفًا ومحّد قال ليها "تعلقي فيي" و"يا ضعيفة الشخصية!".

 

[رَحِيــلْ ،]

وأعتذر عن حدّة كلامي، وأسلوبي. بالتوفيق للجميع.

 

[المهندس عبدالله]

وأعتذر عن حدّة كلامي، وأسلوبي. بالتوفيق للجميع.

ههههه
ضحكت لأن تخيلت بنية وهي تتهاوش (اله ضدها مكسر مسكين )

المهم.. كلام سليم جدًا ..

 

[Dr.Hakim]

لايطوفكم القطار يا جماعة

دامه قطار ركوبه فيه كل هالتعقيد .. عساني ما ركبت قطار يا خوك!

 

[المهندس عبدالله]

لايطوفكم القطار يا جماعة

دامه قطار ركوبه فيه كل هالتعقيد .. عساني ما ركبت قطار يا خوك!

إحنا القطار يا ولدي.. جيفه بعد نطوف نفسنا

 

[المهندس عبدالله]

بس خوفك نطوف الركاب ومحد يركب

 

[عاطفة انثى]

لا تعليق ليس هناك مايثير اهتمامي ​

 

[ولد عمران]

مو احنا المجتمع؟ اللي خلقها يغيّرها. أقل شيء عبّر عن رفضك لهالثقافة الباهتة. أقل شيء التزم باللي يرضي ضميرك بعيدًا عن هالثقافة السطحية.
أرفض المبالغة من الطرفين: الزوج والزوجة. بس أوافق على سالفة تسأل وتبحث وتاخذ قرارك بأريحية.
بس يبقى فرق شاسع بين شراءك سيارة وارتباطك بزوجة. أرفض كلمة الشراء أصلًا على العلاقة..
كلمة الشراء معناها: تبادل منفعة، مادية بين الطرفين، علاقة تحكمها قيمة المال. وداعًا للروح وداعًا للشعور ووداعًا للأخلاق ووداعًا لكلّ القيم الأخرى.

و الله يا الشيخة بختصر كلامي عن "عبر عن رفضك لهالثقافة", بإختصار الناس هني you are either with us or against us, في امثلة واجد ممكن تحصلينها هني.

اكيد في فرق بين سيارة و بني آدم, انا ما قللت من شأن البنت, انا كل إلي قلته, المجتمع خلق ثقافة تخلي عملية الإرتباط و الزواج نوعاً ما كانه تشتري شي.

 

[ولد عمران]

المسألة مو مسألة تعلّق خوك ولا ضعف شخصية.. المسألة احترام،

الساخر في الموضوع هالمفارقة العجيبة في ثقافة "العيب" إذا صحّ التعبير:
أنّ البنيّة قامت تنتظر ردّه حق تقرر مصيرها، بحكم أعرافنا الجميلة اللي ما تسمح للبنية تقابل أكثر من شخص وبعدين تختار بينهم، وبحكم أنها قالت: عيب أدخل على شخص ثاني بينما أني في خطبة الأوّل.
وهو بكلّ برود راح يلايم له أكثر من بنيّة، ويدش على أكثر من وحدة، ويجمع مواصفات حق يجوف أنسب وحدة ويتخيّر بينهم، وتاااالي اتفرّغ عقب شهر يرد عليها: لا والله ما فيه نصيب. وهو راح كمّل حياته عادي يعني، بس لأن فيه قانون عرفي: مو عيب يدش على أكثر من وحدة.
مو انزين ممكن خلال هالفترة اللي قاعد يحطها على الويتنغ، كان من الممكن تدش على غيرها وتجوف نصيبها وتكمّل حياتها؟


لا تقول ليي إنّ من حقها هي بعد وبإمكانها تدش على أكثر من واحد وتختار. والله لو تسويها تقوم الدنيا ولا تقعد من الحجي اللي عليها.
ليش؟ لأنّ ثقافتنا مؤسسة على الغلبة لفحولة الرجل، عيب عليها ما تحترمه، بس لما يجي العكس، حلال أنه ما يحترمها، لأنّ احترامها باطل عرفًا ومحّد قال ليها "تعلقي فيي" و"يا ضعيفة الشخصية!".

في البداية مافي خطبة ولا تقدم لها, إلي انا اشوفه الصبي فقط يتعرف على بنت, معناته ياخذ عنها معلومات بسيطة, انا من صوبي اشوف انه الشخص يحتاج 4 مقابلات على الأقل عشان يجمع معلومات كافية, على سبيل المثال في السبوع مرة, يعني عشان يحصل على معلومات كافية الرجال يحتاج شهر كامل, في هالشهر يقابل اكثر من وحدة, مثلا 3 او ثنتين, و يجمع معلومات عنهم, و الله مثلا من البداية شاف الأول ما تصلح له و من اول اسبوع شاف انه مالها نصيب, يخبرها ما في نصيب و مع السلامة. يبقون 2, و الله شاف وحدة تناسبه اكثر, يقول للثانية مسامحة بس مافي نصيب.

انا ما اشوف انه هذا الشي يقلل من الأحترام, العلاقة إلي بينه و بين البنات في هالفترة سطحية, و لا بينهم عقد ولا إلتزام, الشخص المفروض يبحث عن الشخص المناسب حقه, يعني لو مثلا انا قابلت وحدة 3 مرات و تقريبا قلت هذي هي الشخص المناسب, بس في بنت ثانية بقابلها بعد يومين و هي بعد مناسبة, بحارس اليومين و بقابلها و تالي قلت القبلية افضل لي, في النهاية هو اتخذ قرار صحيح بانه يخطب وحدة انسب ليه. لكن مو معناته يخلي احد يحارس مدة طويلة

 

[بنفسجيه.~]

لايطوفكم القطار يا جماعة

دامه قطار ركوبه فيه كل هالتعقيد .. عساني ما ركبت قطار يا خوك!

ااهاا..اداري هذا القطار اللي يقولون عنه
هذا عاد ما فيه مكان علشان نتخير يفوتنا لو لا..
خلاص..خله يتيسر

و اذا الله كاتب بيجي بداله قطار جديد نركبه

 

[عاطفة انثى]

و الله يا الشيخة بختصر كلامي عن "عبر عن رفضك لهالثقافة", بإختصار الناس هني you are either with us or against us, في امثلة واجد ممكن تحصلينها هني.

اكيد في فرق بين سيارة و بني آدم, انا ما قللت من شأن البنت, انا كل إلي قلته, المجتمع خلق ثقافة تخلي عملية الإرتباط و الزواج نوعاً ما كانه تشتري شي.

اتفق معاك في هشي لان المجتمع اهو الي
يفرض علينا العادات و احنا لازم نتقيد بها
و الا نحن في نظر المجتمع مخالفين بل مجرمين في حق العادات والتقاليد​

 

[Muhammad Aldumistani]

و الله يا الشيخة بختصر كلامي عن "عبر عن رفضك لهالثقافة", بإختصار الناس هني you are either with us or against us, في امثلة واجد ممكن تحصلينها هني.

اكيد في فرق بين سيارة و بني آدم, انا ما قللت من شأن البنت, انا كل إلي قلته, المجتمع خلق ثقافة تخلي عملية الإرتباط و الزواج نوعاً ما كانه تشتري شي.

مشكلتنا كأفراد ما نفكر في المجتمع .. بس في نفسنا .. وهالشي تم مواصل حتى تراكم وصار ثقافة وعقلية في مجتمعنا .. بالتالي أثر على الأفراد (سواء الأبرياء أو سبب العلة -الثقافة الجديدة- منهم).

​

 

[Muhammad Aldumistani]

استانست إنكم طرحتوا هالموضوع .. لأن قاعدين نتعلم من أخطاء الغير.

إن شاء الله في الجيل القادم .. تنشال هالثقافة الي بمجتمعنا. (مرض مو ثقافة -__-")

مافي وعي.

 

[Muhammad Aldumistani]

اتفق معاك في هشي لان المجتمع اهو الي
يفرض علينا العادات و احنا لازم نتقيد بها
و الا نحن في نظر المجتمع مخالفين بل مجرمين في حق العادات والتقاليد​

والله .. قارني عادات وتقاليد الحاضر .. بماضي البحرين أيام العز :\