حوار ساخن بين آدم و حواء ....

[منامي]

الي يخاف ربه بيخاف ربه في الجامعة وبرع الجامعة ..

والي ما يخاف ربه في الجامعة ما بتفرق عنده كان داخل الجامعة أو برع الجامعة ..

والكلام موجه للطرفين

 

[مارد المصباح]

يعني تطبيق الشي بحذافيره نفس ماكان في ذاك الزمن بالضبط على هالزمن،
يعني الحجة الي واجد اسمعها من الناس على سالفة العباية او الحجاب، هل السيدة زينب كانت تطلع بشي ملون؟ هل كانت تلبس حجابها بهالطريقة؟ هل كانت تسوي عبايتها اشكال؟

انزين الي يقول هالحجي وهو يقوله، جايف ثيابه؟ نفس الي كان يلبسه الامام الحسين؟

يعني يتكلمون ماجنه حصل الاف السنوات من التغيير وعلى قولة احد الاعضاء الي كتب
بعض الناس عندنا صدق يفكرون مثل السعودية
وقبل لحد يرد عليي بطريقة جني كفرت بالقضية وبيقوليي لازم نتعظ فيها وبعبرة واقعة الطف وباخلاقهم ومصيبتهم، تره ادري والله ادري جوفو الامثلة الي جبتها وانحصروا فيها وخلاص لحد يشكك في الثاني او يقوله حجي

طبعا لازم بكون في فرق بس من وجهة نظري اجي اطالع الفرق شنو سلبياته وشنو ايجابياته يعني مثلا من زمن الرسول شي معروف ان المرأة المفترض ما تلبس لباس ملفت للنظر مع هالشي يصير حتى في ذاك الزمن -والا ثيابهم كانت ابيض واسود بعد- هههه متأثر بتلفزيونات قبل المهم فايجابياته انه راح يكون اكيد احلى واكشخ ولكن الدفة وجدت لستر الجميل مو لابرازه فلما اليوم مثلا بنية تلبس دفة ملونة او بدون دفة بالرغم من انها ساتره جسدها بس اقول الموقف فيه نسبة من الخطأ لانه السلبية طغت على ايجابية هالشي لكن في هذاك الزمن مثلا كان الرجل يلبس العمامة او الثوب فلما اجي اشوف شنو الايجابية لو لبست العمامة او الثوب ؟ طبعا هذا كان لباس يميز الرجال مثل سالفة الغترة في هالزمن ومن ناحية ثانية كانما ترمز الى ان هذا الشخص عالم كون زمان اول كان في علماء واجد تربوا على ايدي اهل البيت والصحابة وغيرهم فيعني هالشي ما يعتبر سُنة وطبعا بكون مباح

المهم شكلكم استمليتون من هالسالفة فجوفوا لينا سؤال فااااني رحم الله والديكم

 

[Dr.Hakim]

طبعا لازم بكون في فرق بس من وجهة نظري اجي اطالع الفرق شنو سلبياته وشنو ايجابياته يعني مثلا من زمن الرسول شي معروف ان المرأة المفترض ما تلبس لباس ملفت للنظر مع هالشي يصير حتى في ذاك الزمن -والا ثيابهم كانت ابيض واسود بعد- هههه متأثر بتلفزيونات قبل المهم فايجابياته انه راح يكون اكيد احلى واكشخ ولكن الدفة وجدت لستر الجميل مو لابرازه فلما اليوم مثلا بنية تلبس دفة ملونة او بدون دفة بالرغم من انها ساتره جسدها بس اقول الموقف فيه نسبة من الخطأ لانه السلبية طغت على ايجابية هالشي لكن في هذاك الزمن مثلا كان الرجل يلبس العمامة او الثوب فلما اجي اشوف شنو الايجابية لو لبست العمامة او الثوب ؟ طبعا هذا كان لباس يميز الرجال مثل سالفة الغترة في هالزمن ومن ناحية ثانية كانما ترمز الى ان هذا الشخص عالم كون زمان اول كان في علماء واجد تربوا على ايدي اهل البيت والصحابة وغيرهم فيعني هالشي ما يعتبر سُنة وطبعا بكون مباح

اي والله .. ماقمنا نفرق بين العبايات والجلابيات تحت مسمى عباية
والي يريد يتبع الزمن ويلبس ع الموضوه .. سمعت ان في عبايات حق ينزلون البحر ومايو اسلامي بعد

لما يقولون لحواء ان تقتدي بلبس السيدة زينب .. هم ما شافوا لبس السيدة زينب .. لكن القصد هو الاقتداء بعفتها
نفس الكلام للشباب هالأيام .. الي يدعون بأنهم يواكبون الموضة الغريبة الي صرنا نشوفها مؤخراً .. والقهر ان المحلات ما قامت تجيب جينزات محترمة هالأيام!
شفتوا من الي ياخذ الكلام بصورة سطحية الحين؟ ​

 

[ambitious32]

خل نغير الموضوع لانه واضح انه مابينحل .. حواء او ادم احد يسأل سؤال نبي سؤال قوي عاد ..

 

[♥ Smile]

خل نغير الموضوع لانه واضح انه مابينحل .. حواء او ادم احد يسأل سؤال نبي سؤال قوي عاد ..

الشعب يريد تغيير الموضوع

 

[ambitious32]

الشعب يريد تغيير الموضوع

عندي موضوع في بالي بس عام مو عن ادم او حواء ..

 

[♥ Smile]

عندي موضوع في بالي بس عام مو عن ادم او حواء ..

وهذا المطلوب نبي شي بعيد عن آدم وحواء تفضل

 

[ambitious32]

جامعة البحرين ، ومعدل التسيب (اللي يطلعون منها) العالي ،اول فصل نكون جماعة كبيرة ولكن نشوف زملائنا الطلاب والطالبات فصل بعد فصل يقلون اللي يغير تخصصه واللي يحول تطبيقي (انسحاب تكتيكي) واللي يطلق الجامعة بالثلاث ويروح يشتغل او يدرس في جامعة خاصة ، يعني نسبة قليلة اللي تتخرج ، برأيكم ما أسباب هذه المشكلة وهل السبب من الطلبة انفسهم او الجامعة ؟؟ وويش تقترحون من حلول ؟​

 

[♥ Smile]

جامعة البحرين ، ومعدل التسيب (اللي يطلعون منها) العالي ،اول فصل نكون جماعة كبيرة ولكن نشوف زملائنا الطلاب والطالبات فصل بعد فصل يقلون اللي يغير تخصصه واللي يحول تطبيقي (انسحاب تكتيكي) واللي يطلق الجامعة بالثلاث ويروح يشتغل او يدرس في جامعة خاصة ، يعني نسبة قليلة اللي تتخرج ، برأيكم ما أسباب هذه المشكلة وهل السبب من الطلبة انفسهم او الجامعة ؟؟ وويش تقترحون من حلول ؟

المشكله اكيد مو في الجامعه
والدليل ان فيه ناس تخرجوا منها ، وفيها الي موجودين وراح يواصلون فيها
مهما كان عددهم قليل او كثير الا انه موجود وهذا هو المهم
ولو الخلل منها لكانت فاضيه تصفر وسكروها وقلبوها ميدان سباق بعير ونوووق

الخلل في انعدام روح التحدي واليأس بسهوله عند البعض ( اقصد الي يطلق الجامعه )
وبالاضافه الى اللغه ، الانجلينزيه عند البعض شبه منعدمه يعني يصعب عليهم المقررات وتخصصات الي بالانج فقط
والميل وحب الشي السهل ، ياكثر الطاقات الكامنه الي محد درى عنها

فلذالك تنشخل الطلاب ويبقى صاحب العزيمه والاصرار الي يسعى للنجاح ولو كان صعب

​

 

[Waffa]

يوم المرأة العالمي
Happy Women's Day

 

[مارد المصباح]

كل سنة وحواء بخير
لازم نطلع لينا احنا الرجال عيد بس ما بنخليه يوم واحد بس ، اسبوع يكفي والا نزيده ؟
ـــــــــــــــــــــــــــــ
الظروف تلعب دور ولكن اعتقد هذه نسبة بسيطة مقارنة بالطلاب المنسحبين ، في عدد بسيط بعد تشوفهم يدشون الجامعة بهدف انه يفوشر ويروح يقز في الجنس الثاني ، اما الاغلبية فاعتقد يطلعون لان الجامعة فيها شغلات واجد تقهر يعني تتعب وتعبك عالفاضي غير الكادر التعليمي الا اغلبهم يشيبون الراس وحركات الموقع وتغيير الدكاترة وو ..الخ فصاروا يلجئون للمعهد لان مدة التدريس اقل (مجرد سنتين) والدراسة عملي اكثر من ماهي نظري فتفيدك واااجد والشهادة في هالسنتين تعادل دراسة الجامعة في اربع سنوات والبعض يلجأ للجامعات الخاصة ،اما مشكلة اللغة فاعتقد ان الصعوبة الفعلية هي اول سنة بس وبعدين تعتاد تقريبا على هذا الوضع وسواء بقى الطالب في الـ UOB او راح المعهد او جامعة خاصة فكلهم بالانجليزي

[ ومن يتهيب صعود الجبال يعش أبد الدهر بين الحفر ]

 

[XOX]

كل شيء له ثمن.. جامعة البحرين معتمدة لأنه مناهجها مو هينة و المقررات تغطي كميات أكبر من مقررات مشابهه في جامعات ثانية,,

في ناس أشوفهم في الجامعة الحياة حاكتنهم عدل,, ملابسهم متواضعه و فقراء و تخصصاتهم صعبة و وضعهم الإجتماعي عائق لأنه متطلبات الجامعه مو سهله بعد,,لكن مثابرين و تخرجوا الحمد لله,,

في ناس مو متعودة تتعب,, ينصدمون من الفرق بين المجهود المبذول في المدرسة و في جامعة البحرين,, ​

 

[sanabsy 15]

كل شيء له ثمن.. جامعة البحرين معتمدة لأنه مناهجها مو هينة و المقررات تغطي كميات أكبر من مقررات مشابهه في جامعات ثانية,,

في ناس أشوفهم في الجامعة الحياة حاكتنهم عدل,, ملابسهم متواضعه و فقراء و تخصصاتهم صعبة و وضعهم الإجتماعي عائق لأنه متطلبات الجامعه مو سهله بعد,,لكن مثابرين و تخرجوا الحمد لله,,

في ناس مو متعودة تتعب,, ينصدمون من الفرق بين المجهود المبذول في المدرسة و في جامعة البحرين,, ​

وشيقول الي المرض مو مخلنه، ومتأخر حتى عن الدفعات الجديدة وهو شايب، ومحول تخصصه، ويكلمكم من السلمانية، وما راح الجامعة إلا يوم واحد هالكورس

لكن يا هو يا هي

الله كريم والحمد لله

 

[مارد المصباح]

وشيقول الي المرض مو مخلنه، ومتأخر حتى عن الدفعات الجديدة وهو شايب، ومحول تخصصه، ويكلمكم من السلمانية، وما راح الجامعة إلا يوم واحد هالكورس

لكن يا هو يا هي

الله كريم والحمد لله

الله يساعدك صدق سنابسي

 

[XOX]

وشيقول الي المرض مو مخلنه، ومتأخر حتى عن الدفعات الجديدة وهو شايب، ومحول تخصصه، ويكلمكم من السلمانية، وما راح الجامعة إلا يوم واحد هالكورس

لكن يا هو يا هي

الله كريم والحمد لله

و الوضع الصحي بعد تحدي.. و مو سهل أبداً,, الجامعه مرهقه و تحتاج جهد جسدي ,,بس في سعادة ما تنوصف حزة إلا تتخرج و تشوف ثمرة كل هذا التعب,, بإذن الله بيجي اليوم إلا تتخرج فيه.

​

 

[Blue Castle]

( من واقع تجربتي في الجامعة )
أنا دخلت الجامعة متأخر عن دفعتي بفصل كامل و إلي دشو قبلي معظمهم حصلوا منحة ناصر ( طبعاُ أقصد أصدقائي و لصبيان إلي أعرفهم ) المهم معظم إلي حصلوا هاذي المنحة مع الأسف ما أغتنموا الفرصة قاموا يلعبون ، أساساً بعضهم كانوا داخلين الجامعة بس شو شوفوني انا طالب جامعي ، لدرجة أن قامو يستهترون إلى ما يحضر محاضرات إلا على مزاجه و إلي أجي بس يتريق أيااناو يحضر محاضرة و الباقي في الطقاق المهم ذاك الفصل كنت لحد الأن أورنتيشن أول فصل لي و هم كان فصلهم الأول بس كانوا مستهترين بالشي بزيادة ما أدري بس أحس أن المنحة هي السبب يمكن لأن حصلوا الشي بالسهل يعني دراستهم و كتبهم صارت ببلاش يعني ما بفكر خسرت أهلي مبلغ و أخر شي ما سويت زين و باحط على روحي أكثر و للحين الطريق طويل و لازم أجد ، لا بفكر أنا أساساً دارس ببلاش مثل المدرسة يعني شفت روحي ممشي بواصل ، شفت روحي مو أوكي خلاص مو خسران شي ( طبعاً ما أقول كل الي حصلو المنحة جدي بس أنا أتكلم عن الواقع المحيطي بي فقط ما أدري عن كل دفعة 2012 ) المهأم إلي هو الفصل الأول بالنسبة لي ( الأورنتيشن ) و هم خلصوا الفصل الأول بالنسبة لتخصصهم الجامعي ( كم واحد من أصدقائي إلي حصلوا المنحة معدلاتهم زينة الحمد الله بس الباقي معدلات تشيب الراس يعني تحس أنه ما حضر الا جم محاضرة طول الفصل ) المهم جينا للفصل الي طاف داومنا خلصنا جينا هذا الفصل معظم إلي أعرفهم تبخروا يمكن من إلي أعرفهم بقوا بس 5 أو 6 ( أصدقائي ) و السبب طبعاً إلي ما عجبته الجامعة و إلي طلع يدور شغل و إلي حصل إنذارات و المعدل طايح و قال أطلع بدل التعب على قلة الفايدة طبعاً إلي قلته ترا إلي قلته مو مقياس لكل الجامعة بس هذا واحد من عدة أسباب .

 

[sanabsy 15]

الله يساعدك صدق سنابسي

وياك إن شاء الله

و الوضع الصحي بعد تحدي.. و مو سهل أبداً,, الجامعه مرهقه و تحتاج جهد جسدي ,,بس في سعادة ما تنوصف حزة إلا تتخرج و تشوف ثمرة كل هذا التعب,, بإذن الله بيجي اليوم إلا تتخرج فيه.

فعلًا، ما بالش بالتعب النفسي الشديد الناتج عن كل هالتراكم، الواحد يحاتي مرضه أو يحاتي دراسته أو يحاتي مستقبله المتأخر، كل الأمور مرتبطة ببعضها، جانّا وسواس من كل شي، كل إنسان يضحك برّة للناس بس داخله أمور لا يعلم بها إلا الله ولو تكلّم ما بتكفيه صفحات

أقول في التخرّج: وإن كان ذلك اليوم بعيد إلى حدٍ ما - بالنسبة لدفعتي - لكن، ما عندي غير الصبر والأمل بالله

الضربة الي ما تقتلك تقوّيك، والحياة كلها ضربات

بخصوص أساس الموضوع المطروح، الطلّاب أنواع، في منهم من أول ما التحق بالابتدائي - حتى وإن كان مو شاطر - بس عنده قابلية إنه يلتزم في الدراسة ويقابل كتاب، وفي العكس حتى لو تشوفه ذكي بس لا تقول له قابل كتاب وادرس، يطلّع ذكاءه في أمور ثانية، هذا بشكل عام

النقطة الثانية الطالب لما يدخل الجامعة يصطدم بواقع مختلف تمامًا عن المدرسة، فرق بين أستاذ يقول جيب (سيدي فاضي) للبحث، وبين دكتور يقولك البحث أقل شي 8 مصادر، أو يطلب بروجكت + برزنتيشن

النقطة الثالثة بعض الطلاب يزرعون في أنفسهم عقدة النقص، عقدة (ما أقدر) وهذا يزيده البيئة المحيطة خصوصًا إذا ربعه يجوفهم واحد ورى الثاني يطلعون من الجامعة،

فيه نقطة وهي من أساسيات المصاعب، الطالب في الثنوي لما يمسك ورقة التخصصات، يطالع فيها، وين يروح؟!! بيقرأ أسماء التخصصات، وبعدين؟ يا إنّه يدخل ويّه ربعه ومع الخيل يا شقرا، أو يسمع وين التخصص إلي اسمه طالع أكثر شي ويسجّل فيه،

عشان جذي إذا عندكم أي أحد من الأهل على وجه القدوم إلى الجامعة، قعدوا وياه وساعدوه في اختيار التخصص، أنا من خلال التجربة اكتشفت إن راحة الطالب في التخصص هي أهم شي (وبغض النظر إذا كان يحب التخصص أو لا) فرق بين راحة وحب

​

 

[محمدونا]

سنابسي تقريبا ما قصر اوضح النقاط ..

- انا اشوف ان تأثير الجامعة يكون شامل للطلاب .. انا اعرف طلاب تغيّروا " شكل " و ناس تغيّرت " اخلاقهم "

- تاثير الجامعة اكبر نفسيا من تاثيرها جسديا .. ومع ذلك الضرر النفسي يؤدي للضرر الجسدي ،، يعني جدي جدي انت متضرر

- رغم كل التعب و النفسيه و التوتر ووو .. انا اشوف انها علمتنا معنى المسؤولية من بعد ما كانت الحياه عندنا " استهتار "
ما اتكلم بشكل عام .. على الاقل اعني روحي بهالحجي

 

[روؤحي فاطمية]

شسمة عجبني السؤاال ...
( بتكلم من خلال الواقع المحيط بي يعني خلال جم سنة واني معفنة بالجامعه اللي طافت) ...

طبعااا ما اخفي عليكم حصلت انذارين والكل كال لي حول تخصص التطبيقي وكله ينتقذوني
حصلت الانذارين مو لاني غبية او ما افهم او موب حابة التخصص بالعكس لا ..
حصلت الانذارت كان معدلي فوق ال2 و بعدها صارت لي ظروف وصادتني حالات .. وما انسحبت .. وان شاء الله ما تعود تلك الايام :tears:
بس نزل معدلي ... والكل كال لي بيطرودنج ومن هالكلام كلت مدام اني ثقتي بالله قوية واحس اني اكدر اواصل ما بحول الى اي تخصص
بدرس بتخصصي و ما يصيبني شي الا ما كتبة الله لي .. طبعا كانت عندي صديقة تم طردها من الجامعه
لانة ما تهتم ولا شي يعني خسرت بيتهم فلوس وخسرت اهي وكتها وكل شي ...
مع مرور الوكت الحمد ُ لله ارتفع معدلي وطيرت الانذارات كلهم ورحت الى الناس اللي كالو لي لازم تحولين لتطبيقي
كلت لهم تذكرون ذاك الكلام يوم كلتو لي حولي وهيج وانا ما حولت >> باختصار ثبت ليهم الشي اللي اهم ما كدرو يسوونه ...

وعلى سالفة الاشخاص المرضى واللي يدرسون مثل الاخ ( سنابسي ) ما تجوف شر اجر وعافية .
هذولة هالناس المفروض نسميهم الاشاص المثابرين الناجحين الصمووود ...

مثال :
عندي صديقة تعاني من مرض يوم والثاني بالمستشفى وما تحضر المحاظرات
بس تعالو لها نهاية السمستر درجتها احسن من الاشخاص اللي يداومون على طول ..

واخيرا المفترض الشخص يختار تخصصة عشان يتفاعل وياه وياخد ويعطي معاه ...
مو لانة اصدقائك اختارو التخصص انت معاهم لا مردك بتتعرف على اصدقاء يدد ..

الخلاصة دخلت التخصص عن قناعه وحبيتة بتكدر تتفاعل معاه وتاخد وتعطي اياه ..
بس لا تخلي اي احد يحطمكم او تجوف ناس طلعو من الجامعه لانها صعبة بمنظروهم
صعبة ولكن زين الجامعه وخلها حلوة بعيونكم يعني قصو على روحكم على ما تتخرجون ...

 

[علي البلادي]

في بعض السكاشن الاحظ ان البنات ما يقعدون صوب بعض يعني عادي صفة كراسي يقعدون ثنتين و تجي وحدة تقعد وراهم و بهالطريقة يصير الصبيان ما ليهم محل و ممكن واحد مضطر يقعد صوب وحدة فلازم الاخوات يراعون هالشغلة