نقطة أضافية ،
لكل من عاطي المعدل أهمية مبالغ فيها
لو قلنا فيه شخص 1 ،
وشخص 2 ..
رقم 1 ، معدله مثلاً 3.8 ومتخرج وكان طوول حياته طالب من غير نشاطات أو ما شابه ،
ورقم 2 .. معدله مثلاً 2 وتخرج ، وطوال فترة دراسته شارك بالعديد من المؤتمرات !
وحضر فعاليات ، وكان مثلاً يشتغل في فترة الدراسة
وقدمتوا على نفس الوظيفة ..
هل من المعقول راح يقبلون شخص 1 ، على أساس معدله ؟
ويتركون شخص 2 ؟
أترك لكم التعليق ..
+1000
أني أوافقك بسالفة النشاطات انها مهمة واجد
بس اني بقولك أغلب الطلبة في جامعتنا تدري وش هي نشاطاتهم؟
يسجلون في المؤتمر مال البزنس او في الانشطة او المحاضرات
مع احترامي ما احس هذي نشاطات! هرار الصراحة
يعني مؤتمر أعرف واجد بنات يسجلون و هم مايدرون وش سالفة المؤتمر اصلا!
بس تسجيل حظور عشان الشهادة الي بيعطونها اياهم نهاية الكورس
و ثانيا نص كليتنا يسجلون لمؤتمر البزنس
بصراحة ما اجوف هالشي فيه ميزة يعني
بس من ناحية ثانية مثلا انشطة مميزة
يعني مثلا آيزك هذا احس شي يعطي خبرة للطالب و يبني شخصيته
+1000
واجد اعرف بنات توهم متخرجين هم في لوحة الشرف
بصراحة شخصيتهم قوية و بالعكس عايشين حياتهم يمكن أكثر من الي معدلاتهم اقل منهم!
مثل ما فيه شطار يمكن فعلا ما تكون عندهم social life فيه شطار بعد عايشين حياتهم و في نفس الوقت متفوقين
و الي يضحك في السالفة ان صاحبة الموضوع فاتحة موضوع نقاشي
و هي اساسا ما تبي نقاش ،
تبي الردود تأيدها في فكرتها أن الي معدلهم نازل احسن من الي معدلهم عالي
::
+ عندي سؤال محيرني
انتون وش تقصدون بالخبرة؟!
استثنوا الانشطة و هالاشياء
اذا اثنين توهم متخرجين < و حطوا الف خط على كلمة توهم متخرجين
و واحد معدله 3.5 و واحد 2
انزين من وين ليهم الخبرة مثلا؟! اساسا توهم متخرجين!
اني مو قاعدة اتحجى عن شخص اشتغل
لأنه اساسا محور الموضوع أن الشخص اذا تخرج بمعدل 3 أو 2 من له الافضلية
صار لي ساعتين احاول أفهم "smile" بس بدون فايدة... good luck with that.
برايي يأثر
بقولك تخيل روحك انت ال employer لو بيجونك اثنين تنطبق عليهم الشروط و فيهم نفس المواصفات بالضبط
بتختار من؟ أكيد الي معدله أكثر!
ثاني شي فرضاً و هالشي يقولونه لينا الدكاترة واجد
أن وقت الي بتحط ال CV أعتقد مو ضروري تكتب جم معدلك اهم شي عندك شهادة و خلاص
بس فيه شركات معينة مثلا شركات التدقيق تطلب معدلات معينة مثلا 3 أو 3.5
و ثالث شي ، يعني طبيعي الي متخرج بنسبة عالية فاهم في تخصصه أكثر من الي متخرج بنسبة قليلة
و لو ما كان فيه تأثير عجل ليش الناس قاعدة تدبح روحها و تدرس؟!
و ليش الناس قاعدة تتنافس في المعدلات و فيه لوحة شرف مثلا؟
اذا الاثنين بيتساوون في النهاية
خلاص بروح بدرس اي شي و بقدم اي كلام و بجيب مثلا في ال c نجاح و خلاص دام ما فيه فرق!
و آخر نقطة المعدل العالي يعطيك فرص أكثر أنك تكمل ماستر مثلا
و بالنسبة لسالفة الخبرة الي قلتين عنها
انزين ليش مفترضة أن المتفوق ما عنده خبرة؟!
اوكي دام جامعتنا تعتمد على النظري معناته حتى المو متفوق ما عنده خبرة بعد
في هذا المنتدى وفي المنزل ومع أصدقائك وفي كل مكان، إما أن تحترم آراء الآخرين وإما ألا تتناقش معهم
